LA MAPINDUZI, MHESHIMIWA DK. ALI MOHAMED SHEIN,
KATIKA UFUNGUZI
WA KONGAMANO LA TATU LA DIASPORA-
ZANZIBAR BEACH RESORT- MBWENI ZANZIBAR
24 AGOSTI, 2016
Mheshimiwa Dk. Amani Abeid Karume, Rais Mstaafu wa
Zanzibar na Mwenyekiti wa Baraza la Mapinduzi,
Mheshimiwa Dk. Salim Ahmed Salim; Waziri Mkuu Mstaafu
wa Jamhuri ya Muungano wa Tanzania,
Mheshimiwa Zubeir Ali Maulid; Spika wa Baraza la
Wawakilishi,
Mheshimiwa Omar Othman Makungu; Jaji Mkuu wa Zanzibar,
Mheshimiwa Issa Haji Ussi (Gavu); Waziri wa
Nchi, Ofisi ya Rais na Mwenyekiti wa Baraza la Mapinduzi,
Mheshimiwa Dk. Augustine Mahiga (MB); Waziri
wa Mambo ya Nje na Ushirikiano wa Afrika Mashariki,
Waheshimiwa Mawaziri wa Serikali ya Jamhuri ya Muungano
wa Tanzania,
Waheshimiwa Mawaziri wa Serikali ya Mapinduzi ya
Zanzibar,
Mheshimiwa Said Hassan Said; Mwanasheria Mkuu wa
Serikali,
Ndugu Salim Said Baghressa,
Katibu Mkuu Kiongozi na Katibu wa Baraza la Mapinduzi
Dk. Abdulhamid Yahya Mzee,
Waheshimiwa Wabunge na Wajumbe wa Baraza la
Wawakilishi,
Waheshimiwa Mabalozi wadogo wanaofanya kazi zao hapa
Zanzibar,
Ndugu Wanadiaspora na Wageni Waalikwa,
Assalamu Aleikum,
Awali ya yote,
namshukuru Mwenyezi Mungu kwa kutujaaliya uhai na uzima tukaweza kukutana hapa
kwa ajili ya Kongamano hili la Tatu la
Watanzania wanaoishi nje ya nchi yetu yaani Wana “Diaspora” ambapo mara
hii linafanyika hapa Zanzibar. Mtakumbuka kuwa Makongamano mawili ya awali,
yalifanyika Tanzania Bara na yote
mlishiriki kwa wingi na yalifana sana.
Hongereni sana. Nakupongezi kwa kufanikisha makongamano hayo na kwa kushiruiki
kwa wingi.
Natoa shukurani
zangu kwa uongozi wa Ofisi ya Rais wa
Zanzibar na Mwenyekiti wa Baraza la Mapinduzi pamoja na Wizara ya Mambo ya Nje na Ushirikiano wa Afrika
Mashariki kwa kuandaa Kongamano hili na kunialika kuwa Mgeni Rasmi katika ufunguzi.
Sote tunashuhudia kuwa Kongamano hili limefana sana, kwa sababu limeandaliwa
vizuri. Nimeisoma ratiba na nimeiona kuwa nayo imeandaliwa kwa namna yake.
Nimefurahi kuona kuwa katika ratiba yenu mtafanya safari ya ‘Sunset
cruising’, ili kuona mandhari na mazingira ya mji Mkongwe wa Zanzibar
katika nyakati za jioni pamoja na kuitembelea
miradi mbali mbali ya maendeleo. Kadhalika, mtapata fursa ya kuyaona
mambo ya kale na ya sasa, fursa hii ya kuangalia mambo ya kale ni muhimu sana. Mtaweza kuona jinsi mchanganyiko huo maalum
unavyovutia. Mtayaona mambo yalivyo murua “Wahenga
walisema, ukiona vinaelea vimeundwa”. Nawapongeza kwa dhati waandalizi wa
Kongamano hili kwa ubunifu huo kwa ajili yenu - Hongereni sana.
Kadhalika,
nachukua nafasi hii kutoa shukurani na pongezi kwenu Wana “Diaspora” ambao ndio walengwa wa
Kongamano hili, kwa kujitokeza kwa wingi sana. Ni dhahiri kwamba kuukubali
mwaliko huu ni ithibati ya mapenzi
makubwa mlionayo kwa nchi yenu ya asili,
licha ya kuwa baadhi yenu hivi sasa mna uraia wa mataifa mengine. Hata hivyo mmekubali mwaliko huu kwa kutambua ule usemi
usemao, ‘Mtu Kwao ndio ngao’; na ule
usemi wa wazungu usemao “A people without
the knowledge of their past history, origin and culture, is like a tree without
roots.” Tafsiri yake ni kuwa, watu
wasioijua na kuithamini historia yao,
asili pamoja na utamaduni wao ni mithili
ya mti usiokuwa na mizizi.
Ndugu Wanadiaspora, Ndugu viongozi na Wananchi,
Serikali zetu zote mbili, Serikali ya Jamhuri ya
Muungano wa Tanzania na Serikali ya
Mapinduzi ya Zanzibar, zinaandaa aina hii ya Makongamano haya kwa kuwa zinatambua na kuthamini haki na wajibu
wa Wana “Diaspora” wa kushiriki katika
kupanga na kutekeleza mipango ya maendeleo nakupongezeni. Ahsanteni kwa
kujitokeza kwa wingi na karibuni nyumbani.
Kwa wale Wana “Diaspora” ambao hawajawahi kufika Zanzibar,
nakukaribisheni Zanzibar kwa kusema karibuni nyumbani. Imani na ukarimu wa watu
wa Zanzibar unathibitishwa kwa msemo maarufu uliosemwa na Marehemu bibi Siti
bint Saad aliyekuwa Mwimbaji Maarufu wa Zanzibar na kuipatia sifa kubwa
Zanzibar katika moja kati ya nyimbo zake.
Sehemu hio ya nyimbo yake imesema
‘Zanzibar ni njema atakaye aje’.
Kipande hiki cha nyimbo alituelezea Mzee wetu, Mheshimiwa Ali Hassan Mwinyi, Rais
wa Pili wa Jamhuri ya Muungano wa Tanzania, kwa hivyo, Karibuni sana.
Napenda mfahamu
kwamba Makongamano haya ya Watanzania wanaoishi Nchi za Nje, tunayoyafanya kila mwaka, hivi sasa tumeyapa
umuhimu mkubwa. Nataka nikuthibitishiyeni kwamba Makongamano haya yatakuwa
endelevu. Kwa hivyo, nakushaurini
kuwa mnapopanga ratiba zenu za kuja
Tanzania kwa mapumziko kila mwaka,
zingatieni tarehe za kufanyika Makongamano haya ili mpate fursa ya kushiriki.
Mtakumbuka kuwa
nilibainisha dhamira yetu ya kuandaa Kongamano hili Zanzibar kwenye hotuba
yangu ya kufunga Kongamano la mwaka jana iliyosomwa kwa niaba yangu na
aliyekuwa Waziri wa Nchi Ofisi ya Rais Ikulu na Utawala Bora, Mheshimiwa Dk.
Mwinyihaji Makame. Kadhalika dhamira hiyo niliielezea tena katika hotuba yangu
niliyoitoa tarehe 5 Aprili, 2016 wakati nikilizindua Baraza la Tisa la
Wawakilishi la Zanzibar, kwenye ukumbi
wa Baraza la Wawakilishi Mbweni. Leo tunatekeleza dhamira na ahadi hiyo kama
wahenga walivyosema ‘ahadi ni deni’ na ‘ahadi ya muungwana ni neno lake’ na ‘ahadi zetu
ndizo pingu zetu’.
Ndugu Wanadiaspora, Ndugu viongozi na Wananchi,
Suala la
kuwashirikisha Wana “Diaspora” katika kuimarisha maendeleo ya nchi zao za asili limepewa umuhimu mkubwa na mataifa mbali mbali pamoja Jumuiya
za Kimataifa. Umoja wa Afrika kwa wakati mbali mbali umekuwa ukipitisha
maazimio na kufanya mikutano mbali mbali inayohusu masuala ya “Diaspora”.
Takwimu
zilizotolewa na Umoja wa Taifa
zimebainisha kuwa idadi ya watu
wanaoishi nje ya nchi zao imeongezeka zaidi ya mara tatu; kutoka idadi ya watu
milioni 75 iliyokisiwa katika miaka ya sitini hadi watu milioni 232, katika
mwaka 2013. Idadi hiyo ni sawa na asilimia 3 tu ya idadi watu wote
duniani. Vile vile, taarifa ya Benki ya
Dunia ya mwaka 2011 ilibainisha kuwa
kiasi cha watu milioni 30.6 wa Bara la Afrika wanaishi nje ya nchi zao
za asili. Kwa upande wa hapa Tanzania,
kwa mujibu wa taarifa za Wizara ya Mambo ya Nje na Ushirikiano wa Afrika
Mashariki, Watanzania milioni moja wanaishi nje ya nchi wakiwa ni Wana
“Diaspora”.
Makundi haya ya
watu wanaoishi nje ya nchi zao za asili yamekuwa yakituma kiwango kikubwa cha
fedha katika nchi wanazotoka.
Inakadariwa kuwa zaidi ya Dola za Kimarekani Bilioni 40 zilitumwa na
Wana “Diaspora” katika mwaka 2010.
Kiwango hicho kilikuwa kikubwa kuliko kiwango cha misaada rasmi ya
maendeleo iliyotolewa katika mwaka huo kwa bara la Afrika. Nimeamua kutoa
takwimu hizo kwa ufupi, ili muone umuhimu wa kuwa na mipango madhubuti ya kuimarisha mashirikiano na kuwashirikisha
kikamilifu Wana “Diaspora” katika mipango ya maendeleo yetu.
Ndugu Wanadiaspora, Ndugu viongozi na Wananchi,
Juhudi za
kuwashajiisha na kuwashirikisha Watanzania wanaoishi nje ya nchi zimekuwa
zikichukuliwa na Serikali za awamu zilizopita katika pande zote mbili za
Jamhuri ya Muungano wa Tanzania. Dhana
ya “Diaspora” ilianza kupata nguvu zaidi
katika uongozi wa Awamu ya Nne wa Serikali ya Jamhuri ya Muungano wa Tanzania
wakati wa Uongozi wa Rais Dk. Jakaya Mrisho Kikwete. Ni vyema, tukaelezana
kuwa, mwamko huo wa Serikali ya Awamu ya
Nne, ulikwenda sambamba na vuguvugu la kimataifa la kuwahamasisha Wana
“Diaspora”, hasa baada ya tafiti nyingi zilizofanywa kuthibitishwa kuwa michango
ya Wana “Diaspora” imeleta mabadiliko makubwa
ya kimaendeleo katika baadhi ya nchi zao za asili.
Vuguvugu hilo
liliambatana na mikutano na makongamano ya kimataifa ya Wana “Diaspora” kama
huu tunaofanya leo hii. Kwa upande wa
Afrika, juhudi maalum zilichukuliwa kuwahamasisha watu wenye asili ya Afrika
kuitambua asili yao na kuungana na wananchi wenzao walioko Afrika katika kuinua
maendeleo ya bara hili.
Ndugu Wanadiaspora, Ndugu viongozi na Wananchi,
Wakati
nilipokuwa Makamu wa Rais wa Jamhuri ya Muungano wa Tanzania, nilipata fursa ya
kumuwakilisha Rais wa Jamhuri ya Muungano wa Tanzania Dk. Jakaya Mrisho
Kikwete, katika Mkutano wa Pili wa Wasomi wa Afrika na Wana “Diaspora” wenye
asili ya Afrika uliofanyika nchini Brazili, mwezi Julai 2006 kutokana na
mualiko wa Rais De Lula wa Brazili wakati ule kwangu. Baadae, nilimwakilisha tena Rais wa Jamhuri ya
Muungano wa Tanzania Dk. Jakaya Kikwete, kwenye mkutano wa kwanza wa Wana
“Diaspora” wa Tanzania uliofanyika London mwezi wa April, 2008, ambao ulifanikiwa
sana kwa kuwa uliishirikisha sekta ya umma na sekta binafsi. Kwa hakika mkutano
ule ulileta hamasa kubwa kwa Watanzania waliohudhuria na kufikiria zaidi
masuala ya maendeleo ya nchi yetu. Katika mkutano huo baadhi ya makampuni
yaliyokuwepo Tanzania, yalieleza fursa za ajira muhimu kwa Watanzania wenye
ujuzi na ambao wangependa kurejea nyumbani kushiriki katika kujenga nchi yetu.
Ushiriki wenu katika mikutano kama hii ni kielelezo thabiti cha dhamira yenu
katika kuitikia wito wa serikali na viongozi wa nchi yetu wa kuwataka muwe
washirika katika kuijenga nchi yetu.
Ndugu Wanadiaspora, Ndugu viongozi na Wananchi,
Kutokana na
kutambua umuhimu wa Watanzania wanaoishi nchi za nje, Serikali ya Jamhuri ya
Muungano, Awamu ya Nne iliunda Idara maalum kuyashughulikia masuala ya
Watanzania wanaoishi Nchi za Nje (Diaspora), katika Wizara ya Mambo ya Nje na
Ushirikiano wa Kimataifa mwaka 2010 ili kuitekeleza kwa vitendo azma yetu ya
kuwashirikisha Wana “Diaspora” katika kuiendeleza nchi yetu.
Kwa umuhimu huo
huo wa kuyapa nguvu mambo ya “Diaspora”, nami mara baada ya kuchaguliwa kuwa
Rais wa Zanzibar na Mwenyekiti wa Baraza la Mapinduzi mwaka 2010, nilianzisha,
katika Serikali niliyoiunda, kitengo kinachoshughulikia mambo ya Wana
“Diaspora”, ndani ya Ofisi ya Rais na Mwenyekiti wa Baraza la Mapinduzi. Nilikiweka kitengo hicho katika Ofisi yangu
ili kuhakikisha kuwa kinatekeleza majukumu yake ipasavyo kwa kushirikiana
na Wizara ya Mambo ya Nchi za nje na
Ushirikiano wa Kimataifa wakati ule. Tangu wakati huo, nimekuwa nikifuatilia
kwa karibu zaidi utekelezaji wa kazi zake na ukuaji wa kitengo hicho ambacho
hivi sasa nimekifanya kuwa Idara kamili,
inayoshughulikia mambo ya Ushirikiano
wa Kimataifa na Uratibu wa Wazanzibari Wanaioshi Nchi za Nje.
Kadhalika, katika kipindi chote tangu Idara hio ilipoanzishwa Wana “Diaspora”
au vikundi vyao, ambavyo vimekuwa vikitembelea Zanzibar kushiriki katika
shughuli za maendeleo na vile vinavyotoa huduma kwa jamii. Baadhi yenu mtakumbuka hafla ya chakula cha
mchana niliyoiandaa Jumamosi ya
tarehe 9 Agosti, 2014 kwa ajili ya Wana
“Diaspora” katika viwanja vya Ikulu - Zanzibar. Hafla ile nayo ilifana sana na
naamini kwamba nanyi bado imo katika
kumbukumbu zenu.
Kwa hivyo Idara ya Ushirikiano wa
Kimataifa na Uratibu wa Wazanzibari Wanaioshi Nchi za Nje kwa upande
wa Zanzibar ndiyo inayosimamia masuala ya “Diaspora” na nimekuwa nikiwaelekeza
viongozi wake kufanya ziara za kujifunza
katika nchi zinazofanya vizuri katika kuwashirikisha Wana “Diaspora” katika
mipango ya maendeleo. Nchi hizo ni pamoja na Ghana, Brazili, Ethiopia na India.
Wito wangu kwenu Wana “Diaspora”, muitumie vizuri Idara hii kwani ipo kwa ajili
yenu.
Natoa shukrani
kwa Rais wa Jamhuri ya Muungano wa Tanzania; Mheshimiwa Dk. John Pombe Magufuli
kwa kumteua Mheshimiwa Dk. Augustine Mahiga kuwa Waziri wa Mambo ya
Nje na Ushirikiano wa Afrika Mashariki, Wizara ambayo ina jukumu kubwa
katika kusimamia na kushughulikia masuala yote yanahusu Wana “Diaspora”. Mheshimiwa Balozi Augustine Mahiga ambaye
ametumia kipindi kirefu cha utumishi wake serikalini akiwa nje ya nchi, amepata
uzoefu mkubwa, hivyo anayafahamu kwa kina masuala muhimu yanayowagusa Wana
“Diaspora”. Ninaamini kwamba ataiendeleza vizuri kazi iliyoanzishwa na viongozi
wa Awamu zilizopita. Kwa upande wa Zanzibar, Ofisi ya Rais na Mwenyekiti wa
Baraza la Mapinduzi, itaendelea kushirikiana na wahusika wote kwa lengo la
kukuza na kuimarisha ustawi wa Wana “Diaspora”.
Vile vile,
nachukua nafasi hii kutoa pongezi maalum kwa Ofisi za Kibalozi za Jamhuri ya Muungano
wa Tanzania, katika nchi mbali mbali kwa
kufanya kazi kwa karibu na kwa kushirikiana na Wana “Diaspora” katika nchi na
kanda ambazo ofisi hizo zimepewa jukumu la kuwatumikia. Vile vile, natoa
shukurani kwenu Waheshimiwa Mabalozi kwa juhudi zenu za kushiriki katika
makongamano haya ya “Diaspora” kila mwaka yanapofanyika. Nawahimiza Wana
“Diaspora” kuzitumia vizuri Ofisi hizi za kibalozi kwa kutafuta ushauri, kupata nasaha, na
misaada mbali mbali kila mnapohisi inafaa kuleta hapa nyumbani. Hizo ni Ofisi
zenu na mjisikie mpo nyumbani wakati
mnapozitembelea.
Ndugu Wanadiaspora, Ndugu viongozi na Wananchi,
Nimefurahi
kuona kwamba Taasisi nyingi za binafsi zimekubali kwa ushindani mkubwa
kuudhamini Mkutano huu, ili kupata
fursa ya kuonana na kuzungumza nanyi Wana “Diaspora” kwa karibu zaidi. Napenda kutoa shukurani kwa wadhamini wote
waliojitokeza kulidhamini kongamano na wale wote ambao waliotaka kushiriki
lakini wakakosa fursa hiyo kwa sababu mbali mbali. Nakuhimizeni Wana “Diaspora” muyatembelee
mabanda ya maonesho ya Taasisi
mbali mbali zilizopo hapa pamoja na vituo vya wajasiriamali ili mpate fursa ya kununua bidhaa mbali mbali
walizotutayarishia. Hongereni
Wajasiriamali wetu.
Ndugu Wanadiaspora, Ndugu viongozi na Wananchi,
Nafahamu kwamba,
kama ilivyofanyika katika makongamano yaliyotangulia, mada mbali mbali ambazo zimechaguliwa kutokana na
umuhimu wake kwa maendeleo na ustawi wa Wana “Diaspora” na nchi yetu kwa jumla, zitawasilishwa hapa.
Nasaha zangu kwenu ni kuwa fuatilieni kwa umakini mkubwa, ulizeni maswali,
toeni duku duku lenu kwa utaratibu mzuri kwa kuzingatia maudhui na kanuni
zinaongoza mikutano ya aina hii. Nawaahidi kwamba Serikali zetu zitayafanyia
kazi mapendekezo na maazimio yatakayopitishwa katika Kongamano hili. Natanguliza pongezi zangu za dhati kwa watoa
mada na wasimamizi wote wa mijadala waliochaguliwa na kukubali kuja hapa
kuifanya kazi hiyo.
Ndugu Wanadiaspora, Ndugu viongozi na Wananchi,
Kama alivyoeleza Mheshimiwa Waziri wa
Mambo ya Nje na Ushirikiano wa Afrika Mashariki, Kongamano hili limelenga
katika kuwahamasisha na kuwashajiisha Wana “Diaspora” kushiriki katika
kuendeleza sekta ya Utalii nchini ikiwa ni njia mojawapo ya kukuza uwekezaji
nchini mwetu. Kwa msingi huo kauli mbiu ya Kongamano hili imeamuliwa kuwa ni “Bridging
Tanzania Tourism and Investment: A new Outlook”, yaani Kuiunganisha Sekta ya
Utalii na ya Uwekezaji: Mtazamo Mpya.
Natoa pongezi
kwa waandaaji wa Kongamano hili kwa umahiri na umakini wao katika kuchagua
kauli mbiu za makongamano yetu. Kauli mbiu hii imekuja wakati mzuri ambapo
Serikali ya Jamhuri ya Muungno wa Tanzania
na Serikali ya Mapinduzi ya
Zanzibar, zimeelekeza nguvu kubwa katika kuikuza sekta ya utalii na sekta ya uwekezaji, ili
ziwe na mchango mkubwa katika kukuza
ajira na kuimarisha uchumi wetu. Kwa
upande wa Zanzibar, sekta ya utalii hivi
sasa ndiyo sekta kiongozi na imekuwa ikichangia zaidi ya asilimia 80 ya fedha
za kigeni zinazokusanywa na asilimia 27
katika Pato la Taifa la Zanzibar. Dhamira ya Serikali ya Mapinduzi ya Zanzibar
ni kuongeza idadi ya wageni wanaoitembelea Zanzibar hadi kufikia watalii
500,000 ifikapo mwaka 2020, lakini kutokana na jitihada zinazoendelea kufanywa
hivi sasa, utekelezaji wake unaashiria kulivuka lengo hilo ifikapo mwaka huo.
Takwimu zinaonesha kuwa mwaka 2010 watalii 132,836
walitembelea Zanzibar na mwaka 2014 watalii 311,801 walitembelea Zanzibar,
ikiwa ni ongezeko la asilimia 134. Kwa hivyo hatuko mbali katika kufikisha
watalii hao 500,000.
Ndugu Wanadiaspora, Ndugu viongozi na Wananchi,
Katika sekta ya
uwekezaji, Serikali zetu zote mbili zimekuwa zikipanga na kutekeleza mikakati
mbali mbali ya kukuza uwekezaji kwa kuweka mazingira mazuri yanayowavutia na kuwashajiisha wawekezaji wa ndani na nje ya nchi, mkiwemo nyinyi Wana
“Diaspora”. Serikali zimepanua fursa za uwekezaji katika sekta ya utalii,
biashara, viwanda, kilimo, ufugaji, uvuvi wa bahari kuu, ujenzi wa nyumba, na
sekta nyengine mpya zinazoibuka katika uchumi wetu ikiwemo sekta mpya ya gesi
na mafuta kwa hapa Zanzibar kwa miaka michache ijayo. Hizi ni fursa zilizopo
hapa kwenu na tunataka mzielewe kwa kina, ili mje na mikakati imara ya
kuzitumia kwa faida ya nchi yetu na kwa faida yenu. Muendelee kuwa na
ujasiri, na muwe tayari kuzichangamkia
fursa hizi kama wanavyofanya Wana “Diaspora” wa baadhi ya nchi, ambao wameweza
kuleta mabadiliko makubwa katika nchi zao, ikiwemo Ghana, Brazil, Ethiopia na India. Hapa Zanzibar maeneo ya Fumba na Micheweni yapo
tayari kwa kuwekezwa na kazi za ujenzi zimeanza katika maeneo hayo Serikali kwa
kushirikiana na Kampuni ya Bwana Baghresa ambapo kazi tayari imeanza,
katembeleeni Fumba. Kwa hivyo, hapana
shaka nanyi mtashiriki katika kuyatumia
vilivyo.
Fursa hizi zipo
kwa wenye mitaji mikubwa na wenye mitaji
midogo midogo. Kwa kuwa hapa ni kwenu,
mnaweza kujipanga kwa kadri hali inavyoruhusu. Msisubiri hadi muwe na fedha nyingi au mitaji
mikubwa, jambo ambalo katika mtiririko wa maisha ya sasa
ni gumu. Kwa wale wenye kuwekeza
kwenye biashara ndogo ndogo na ujenzi wa
nyumba, nakushaurini mtafute wasimamizi waaminifu na waadilifu ili kuepukana na
udanganyifu ambao baadhi ya wakati hutokezea na kukuvunjeni moyo. Jengeni utamaduni wa kuja nyumbani mara kwa
mara kwa ajili ya kufuatilia mambo yenu na fursa zilizopo. Msipende kuagiza.
Zingatieni ule usemi maarufu wa lugha yetu kuwa. “Kuagiza ni kufyekeza”
Katika
utekelezaji wa dhamira ya kuunganisha
utalii na uwekezaji, Serikali zenu zimekuwa zikipanga mikakati imara ya
kuendeleza miundombinu kwa kuzingatia ukweli kuwa miundombinu ndiyo daraja bora
la kuziunganisha sekta zote za kiuchumi ikiwemo sekta muhimu ya utalii. Juhudi
kubwa zinaendelea kufanywa katika
kuiendeleza ujenzi wa miundombinu ya barabara mbali mbali, viwanja vya ndege na
bandari katika pande zote mbili za Jamhuri ya Muungano wa Tanzania.
Kwa upande wa Zanzibar hivi sasa tunakamilisha kukiimarisha kiwanja cha
ndege cha Abeid Amani Karume, tumeanza kukiimarisha kiwanja cha ndege cha Pemba
na hivi karibuni tutaupanua na kujenga jengo jipya la abiria, tutaanza ujenzi
wa bandari ya Mpigaduri ambayo itajengwa kwa awamu tatu.
Ndugu Wanadiaspora,
Ndugu viongozi na Wananchi,
Kadhalika,
nakushaurini mzitumie fursa zilizopo za kitaalamu katika sekta mbali mbali.
Nchi yetu inahitaji wataalamu katika nyanja nyingi hasa katika maeneo mapya ya
kiuchumi yanayoibuka na yale yaliyopewa kipaumbele na Serikali zetu hivi sasa. Tunahitaji
wahandisi kwa ajili ya kuendeleza viwanda,
kuimarisha sekta ya mafuta na gesi na utekelezaji wa mipango miji. Najua
nyote mnatamani kuona mabadiliko ya haraka ya ujenzi wa miji yetu ili iwe ya
kisasa na ifanane na miji mikubwa iliyo
katika baadhi ya nchi mnazoishi, lakini lazima mfahamu kuwa nanyi mnawajibu na
jukumu kubwa la kuleta mabadiliko hayo tunayokusudia ili na sisi tupendeze kama
wenzetu. Vile vile, tunahitaji madaktari
kwa ajili ya kuendeleza hospitali zetu na wahadhiri katika vyuo vikuu ili
kukuza sekta ya elimu ambayo ndio msingi
katika kujenga sekta nyengine.
Sina shaka kwamba fursa hizi mtazichangamkia fursa hizi na mtakuwa tayari kuja
nyumbani kufanya kazi katika sekta hizo.
Ndugu Wanadispora,
Ndugu viongozi na Wananchi,
Kwa upande wa
Zanzibar, Serikali imo katika hatua za mwisho za kutayarisha Sera ya “Diaspora”
ambayo tutaipitisha wakati wowote kuanzia sasa.
Sera hiyo, itakapokamilika, pamoja na mambo mengine, itafafanua
na kuweka wazi dira na dhamira
zetu katika utekelezaji wa masuala
muhimu yanayokuhusuni nyinyi Wana
“Diaspora” na njia bora za kushirikiana katika kutekeleza masuala mbali mbali
ya maendeleo.
Sera itaainisha
fursa zilizopo katika sekta zote za kiuchumi, na kijamii nilizozieleza
kabla. Kadhalika, Sera itaelekeza njia
bora za kutuma na kupokea fedha pamoja na kuiimarisha misaada ambayo mmekuwa
mkiitoa kwa ajili ya utekelezaji wa mipango ya maendeleo. Kadhalika, Sera hii
itabainisha sheria na wahusika muhimu katika kuyashughulikia na
kuyatekeleza masuala ya “Diáspora”.
Natoa wito kwenu nyote mje kuisoma vizuri Sera itakapokamilika na kwamba
nimeshaagiza kwamba mara tu itakapomalizika iwekwe katika
tovuti ya Ikulu ya Zanzibar, ili kila mmoja aweze kuisoma popote alipo
na aweze kutumia na pale na pale ambapo tutahitajia kutunga sheria basi
tutafanya hivyo.
Ndugu Wanadiaspora,
Ndugu viongozi na Wananchi,
Kwa niaba ya
viongozi wenzangu, napenda kutoa
shukurani kwenu kwa mapokezi mazuri mnayotupa wakati tunapozitembelea nchi mnazoishi. Natoa
shukurani kwenu, vile vile, kwa jitihada mnazozifanya za kuhudhuria mikutano ambayo huwa tunaiandaa
makusudi kwa ajili yenu wakati tunapozitembelea nchi mnazoishi. Nasaha zangu
kwenu ni kuwa muendeleze utamaduni na ukarimu huo. Napenda mfahamu kwamba sisi tunathamini sana
juhudi zenu na naahidi kwamba tunaendelea kukutana na nyinyi kila tutakapopata
nafasi ya kufanya ziara katika nchi mnazoishi.
Kwa mara
nyengine tena, nakunasihini sana muendelee kuwa mabalozi wazuri wa Jamhuri ya Muungano wa Tanzania
katika nchi mnazoishi. Endeleeni kuwa mfano wa tabia njema ili muendeleze sifa
ya ukarimu, urafiki na usalama ambayo nchi yetu na raia wake wamejijengea na
inatambulika katika mataifa yote duniani.
Zielezeeni sifa nzuri za nchi yetu pamoja na watu wake. Endeleeni kuishi
kwa kuzingatia misingi ya urafiki, na udugu huku mkiwa na mapenzi makubwa baina
yenu pamoja na nchi yenu ya asili.
Imarisheni jumuiya zenu na zitumieni kama nyenzo muhimu katika kuzilinda
na kuzifuatilia haki zenu pamoja na kuimarisha mshikamano na umoja mlionao
miongoni mwenu. Endelezeni utamaduni wa kujiwekea malengo kwa kuzingatia hekima
na usemi maarufu wa lugha yetu ya kuwa “mchumia
juani hulia kivulini”
Nakunasihini
mzingatie suala la utii wa sheria za nchi na sehemu mnazoishi jambo ambalo mnalifanya vizuri bila shuruti
kama ni siri kubwa ya mafanikio katika
maisha ya binaadamu popote anapoishi. Endelezeni utamaduni wa kuja kutembea
nyumbani kila baada ya muda, jambo ambalo ni muhimu na linaimarisha mapenzi
baina yenu na ndugu, jamaa na wazazi wenu. Mkija nyumbani mnapata fursa nzuri
ya kujikumbusha zaidi mila na desturi zetu pamoja na kupima fursa zilizopo. Mkija nyumbani,
fanyeni jitihada za kuja na watoto wenu ili nao wapate fursa za kuyaona mambo
mbali mbali ili waweze kuyathamini mambo ya nchi yao ya asili. Mnatambua fika kuwa vizazi vyenu ni watu
muhimu katika mipango yetu ya kuendeleza dhana hii ya “Diaspora”. Kwa hivyo,
ninaamini kwa jambo hili mtalitia mkazo na mtalipa umuhimu unaostahiki.
Kumbukeni kwamba hivi sasa baadhi ya
nchi, ikiwemo India zinafaidika na michango mbali mbali inayotolewa na kizazi
cha pili na cha tatu cha “Diaspora”; hasa katika suala zima la uhaulishaji wa
taaluma na teknolojia pamoja na mitaji.
Endeleeni kuzifuatilia kwa karibu taarifa za nyumbani kwa kutumia vyombo
vya habari vinavyoaminika. Kwa mara
nyengine tena, nakuhimizeni mzitumie vizuri Ofisi zetu za Kibalozi na kutafuta
ushauri kwa mabalozi na maofisa wa balozi hizo kwa masuala mbali mbali.
Ndugu Wanadiaspora,
Ndugu Viongozi na Wananchi,
Kabla ya
sijamaliza hotuba yangu, kwa mara
nyengine tena natoa shukurani maalum kwa Ofisi ya Rais na Mwenyekiti wa Baraza
la Mapinduzi na Wizara ya Mambo ya Nje
na Ushirikiano wa Afrika Mashariki kwa kuandaa Kongamano hili na kwa
kunialika kuwa Mgeni Rasmi. Vile Vile, natoa shukurani zangu kwenu Wana
“Diaspora” na wageni wote waalikwa kwa kujitokeza kwa wingi katika Mkutano huu.
Nakutakieni usikilizaji na ushiriki mzuri katika programu zote
zilizotayarishwa kwa ajili ya Kongamano hili muhimu na la
kihisotria. Naamini kuwa mijadala ya Kongamano hili itafanyika kwa umakini
mkubwa, utaalamu, uzoefu na nidhamu inayolingana na utamaduni wetu, kama
ilivyokuwa katika makongamano yaliyopita.
Kongamano hili litazidi kuimarisha uhusiano wetu na kujenga daraja imara
la uhusiano na ushirikiano miongoni mwetu na washirika wa maendeleo; kwa lengo
la kuifanya nchi yetu kuwa imara zaidi kiuchumi na kijamii. Kwa wale
wanaoendelea kuwepo hapa Tanzania kwa mapumziko baada ya Kongamano hili
nawatakia mapumziko mema na wale wanaosafiri kurejea nchi mbali mbali
mnazoishi, nakutakieni safari njema. Mategemeo yetu ni kuwa sote tutakuwa
pamoja katika Kongamano la mwakani, na Inshaallah, Mwenyezi Mungu atayajaaliya
yote hayo yawe. Tunamuomba Mwenyezi Mungu aizidishie baraka na neema nchi yetu
na adumishie hali ya amani na utulivu
tuliyonayo.
Baada ya kusema hayo, napenda kutamka kwamba Kongamano
hili la Tatu la “Diaspora” limefunguliwa
rasmi.
Ahsanteni sana kwa kunisikiliza.
0 comments:
Post a Comment