Rais Magufuli atengua uteuzi wa Mkuu wa Mkoa wa Shinyanga Anna Kilango Malecella

Rais wa Jamhuri ya Muungano wa Tanzania, Dkt. John Pombe Joseph Magufuli ametengua uteuzi wa Mkuu wa Mkoa wa Shinyanga, Mama Anna Kilango Malecella, kwa kubaini kuwa alimwambia uongo kuwa Mkoa wake hauna wafanyakazi hewa.

Rais Magufuli amesema hakuamini kuna mkoa uliokuwa hauna wafanyakazi hewa, hivyo akatuma kikosi kazi ambacho hadi usiku wa kuamkia leo kimebaini kuwepo wafanyakazi hewa 45 mkoani Shinyanya.

Rais pia ametengua uteuzi wa  Katibu Tawala wa Mkoa huo Abdul R. Dachi kwa kumshauri vibaya Mkuu wa Mkoa.

Akizungumza baada ya kupokea Ripoti ya TAKUKURU  toka kwa Mkurugenzi wake Mkuu Valentino Mlowola,  Rais Magufuli amesema kasikitishwa sana na kauli ya Mama Malecela ambaye bila shaka alikuwa amepata ushauri mbaya toka kwa watendaji wake.

Rais Magufuli amesema pia hadi jana jumla ya wafanyakazi hewa zaidi ya 5,507 wamebainika nchi nzima, wengi wao wakitoka katika halmashauri.

Katika hatua nyengine ametoa siku 15 kwa  wakurugenzi wa halmashauri kuwatotoe katika Orodha ya Malipo ya Mshahara (Pay Roll) wafanyakazi hewa wote katika halmashauri zote nchini, na kuwataka wakuu wa Mikoa hao wasimamie zoezi hilo kwa ukamilifu.