Wizara ya Uwezeshaji, Ustawi wa Jamii, Vijana, Wanawake na Watoto kuwa na mkakatiya kuacha utegemezi wa wafadhili.

STATE HOUSE ZANZIBAR

OFFICE OF THE PRESS SECRETARY

PRESS RELEASE

Zanzibar                                                                                                                          25 Aprili, 2014

Rais wa Zanzibar na Mwenyekiti wa Baraza la Mapinduzi Dk. Ali Mohamed Shein ameitaka Wizara ya Uwezeshaji, Ustawi wa Jamii, Vijana, Wanawake na Watoto kuwa na mapango mbadala kugharimia miradi inayotekelezwa kwa ufadhili.

 Akikamilisha mjadala wa Taarifa ya Utekelezaji wa Mpangokazi wa Wziara hiyo Dk. Shein alisema ni vyema kwa Wizara kujiandaa kwa kuweka utaratibu wa kutenga fedha katika bajeti yake ya kila mwaka hatua kwa hatua kupunguza utegemezi kutoka kwa wafadhili.

 Katika kikao hicho Dk. Shein aliikumbusha Wizara hiyo kuweka vigezo maalum katika kuteua wajasiriamali wanaowakilisha Zanzibar katika maonesho mbalimbali ili kuhakikisha kuwa uwakilishi wa Zanzibar katika maonesho hayo unakuwa bora na wenye ushindani.

 Kwa upande wake Mshauri wa Rais masuala ya Uwezeshaji Bwana Abdulrahman Mwinyimbegu alieleza haja ya wizara hiyo kuimarisha utoaji elimu kuhusu usajili wa vikundi vya wajasiriamali ili wajasiriamali hao waweze kukidhi masharti ya kupata mikopo ya vikundi.

 Katika maelezo yake ya awali katika kikao hicho yaliyosomwa kwa niaba yake na Katibu Mkuu Bibi Asha Ali Abdalla, Waziri wa Uwezeshaji, Ustawi wa Jamii, Vijana, Wanawake na Watoto Bibi Zainab Omar Mohamed alisema kuwa pamoja na Wizara kuweza kutekeleza majukumu yake kwa ufanisi katika kipindi husika lakini inakabiliwa na changamoto mbalimbali.

 Alizitaja changamoto hizo kuwa ni pamoja na mahitaji makubwa ya masuala ya uwezeshaji na huduma za hifadhi ya jamii ikilinganishwa na uwezo uliopo, na uhaba wa watumishi wenye sifa.

 Alieleza kuwa katika cha Julai 2013 na Machi 2014 Wizara yake, kwa kushirikiana na wadau wengine, imeendelea na kampeni yake ya kupiga vita vitendo vya udhalilishaji wa jinsia.

 Katika kufanya hivyo alibainisha kuwa mbali ya Wizara kuunda Kamati ya Kitaifa ya Kupambana na vitendo hivyo lakini pia imekuwa ikizijengea uwezo Kamati za Kupambana na udhalilishaji huo na kuongeza kasi ya kutoa elimu ikiwemo kupitia vyombo vya habari kuhusu athari za vitendo hivyo kwa jamii.

 Aliongeza kuwa katika kipindi cha miezi tisa iliyopita, Wizara imekamilisha uandaaji wa Sheria ya Kuanzisha Baraza la Vijana ambapo hivi sasa Wizara iko mbioni kuandaa kanuni za Sheria hiyo ili Baraza hilo liweze kuanzishwa rasmi na kuchukua nafasi yake.

 Akiwasilisha utekelezaji wa Mpangokazi wa Wizara hiyo, Katibu Mkuu Bi. Asha Ali Abdalla alieleza kuwa katika maonesho ya Wiki ya Uwezeshaji yaliyoandaliwa na Wizara yake jumla ya bidhaa 10 ziliweza kupata ufadhili wa kutengeneza utambulisho wake ‘barcode’ ili kuziwezesha kuingia rasmi katika soko.

 Bi. Asha aliongeza kuwa katika kipindi hicho Wizara iliweza pia kuwawezesha wajasiriamali 50 kushiriki Maonesho ya Wajasiriamali Wadogowadogo maarufu kwa jina la Jua Kali huko Kenya.

 Alifafanua kuwa mafunzo mbalimbali ya kuwajengea uwezo wajasiriamali yameendelea kutolewa na Wizara inaendelea pia na mchakato wa kutambua vikundi vya ushirika kwa lengo la kuvijengea uwezo na kuviwezesha kufaidika na huduma zitolewazo na Serikali.

 Taarifa hiyo ya Katibu Mkuu ilionesha pia kuwa zoezi la ukaguzi wa vyama vya ushirika linalofanywa na Wizara hiyo ilibainisha kuongezeka kwa usahihi wa mapato na ongezeko la mitaji ya vyama pamoja na kuimarika kwa udhibiti wa matumizi.

saidameir ikulu zanzibar