Balozi Seif aharisha kikao cha kwanza cha Baraza la Wawakilishi Zanzibar

Makamu wa Pili wa Rais wa Zanzibar Balozi Seif Ali Iddi amesema Wajumbe wa Baraza la Wawakilishi wana jukumu kubwa la kuisimamia na kuishauri Serikali Kuu ili kuhakikisha matatizo na kero zinazowakabili Wananchi katika maeneo mbali mbali nchini zinatatuliwa kwa ufanisi na mafanikio makubwa.

Amesema Wawakilishi pia wanapaswa kuhakikisha kuwa Serikali inatoa mchango wake kikamilifu katika kuyafanya maisha ya Wananchi wote kuwa bora zaidi kwa kutumia nguvu kazi na rasilmali zilizopo hapa Nchini.

Akitoa hoja ya kuahirisha Mkutano wa kwanza wa Baraza la Tisa la Wawakilishi Zanzibar huko katika Ukumbi wa Baraza hilo Mbweni nje kidogo ya Mji wa Zanzibar Balozi Seif amesema Serikali ina matarajio ya kupata Taarifa na ushauri kutoka kwa Wawakilishi hao juu ya maeneo yatakayohitaji kupewa msukumo ili kuongeza kasi ya Maendeleo.

Amesema heshima kubwa waliyotoa Wananchi katika kuwachaguwaWawakilishi hao kuwa Wajumbe wa Baraza la Wawakilishi iwe macho na masikio yao katika mategemeo ya kusaidiwa kutatua changamoto zaombali mbali za maendeleo zinazowakabili kila siku.

“ Sisi ndio masikio na macho ya Wananchi. Wametupa heshima kubwa kwa kutuchagua kuwa wajumbe wa Baraza hili wakiwa na mategemeo  makubwa  tutawasaidia kutatua changamoto tofauti za maendeleo zinazowakabili ”. Amesema Balozi Seif.

Amewaomba waheshimiwa Wawakilishi kwa vile uchaguzi umekwisha warudi Majimboni mwao ili kushirikiane na Wananchi wao katika kuelekeza nguvu zao kwenye harakati za maendeleo sambamba na kudumisha amani na utulivu wa Visiwa hivi.

Amesema Serikali  itaendelea kusimamia suala la amani na utulivu kwa nguvu zote ili kutekeleza mipango ya kujiletea maendeleo zaidi ya Kiuchumi, Kijamii na Kisiasa.

 Balozi Seif amesema hakuna haja ya kukumbushana mambo yaliyopita licha ya Serikali kutambua wapo baadhi ya Watu wakorofi wanaojihusisha na vitendo vya kuhatarisha amani ya Nchi iliyopo kwa sasa.

Amefahamisha kuwa wakorofi hao walijihusisha na utegeji wa miripuko inayosadikiwa kuwa mabomu na kuchoma moto mashamba ya mikarafuu, nyumba za baadhi ya wananchi pamoja na maskani za Chama cha Mapinduzi.

Amesema vyombo vya dola vinaendelea na hatua ya  uchunguzi wa matukio hayo na baadaye kuchukuwa hatua kwa mujibu wa sheria na kuonya kwamba hakutakuwa na mtu atakayepona kuchukuliwa hatua kali za kisheria iwapo atabainika kutishia amani na utuliovu wa Taifa.

Akizungumzia  suala la uwajibikaji  katika Taasisi za Umma Makamu wa Pili wa Rais wa Zanzibar Balozi Seif  amewaomba Watendaji wote wa Serikali  watakaoteuliwa hapo baadae wakubali kwa moyo wao mkunjufu kuwatumikia Wananchi bila ya kujali itikadi zao za kisiasa, jinsia au Dini.

Balozi Seif amesema Serikali muda wote imekuwa ikihimiza uwajibikaji sambamba na usimamizi mzuri wa fedha na rasilmali nyengine za umma katika ngazi zote.

Ameonya kwamba zipo Idara na Taasisi za Serikali zilizooza  sana na kulalamikiwa  na Wananchi kwa sababu ya kutowajibika kwa watendaji wa Taasisi hizo. Hivyo amehidi kumsaidia Rais katika kuyatumbua majipu yatakayojitokeza.

“ Nawaomba watendaji watakaoteuliwa wasikae maofisini tu, bali wazitemnbelee taasisi zilizo nchini yao ili waone uwajibikaji wa Taasisi hizo. Na mimi naahidi kumsaidia Mheshimiwa Rais katika kuyatumbua majipu yatakayojitokeza ”. Alisema Balozi Seif.

Akigusia tabia ya baadhi ya wafanyabiashara kuuza bidhaa  zao katika mfumo wa ubaguzi kwa sababu za itikadi za Kisiasa Balozi Seif  ameonya kwamba jambo hilo sio zuri na ingefaa likaachwa mara moja.

Amesema inasikitisha na mambo yanayotokea katika baadhi ya maeneo Kisiwani Pemba ambako baadhi ya wafanyabiashara wameanzisha mtindo wa kuwanyima Wananchi wenzao kuwauzia bidhaa kwa sababu za tofauti za kisiasa.

Balozi Seif ameeleza kwamba Serikali ya Mapinduzi ya Zanzibar inalifuatilia kwa karibu suala hilo na haitasita kumchukulia hatua kali za kisheria mfanyabiashara yeyote atakayebainika kuendeleza jambo hilo ikiwa ni pamoja na kumfutia  mara moja leseni yake ya biashara.

Akigusia migogoro ya ardhi iliyoleta changamoto kubwa kwa Serikali katika kipindi kilichopita Makamu wa Pili wa Rais wa Zanzibar amesema kadhia hiyo kwa kiasi kikubwa imesababishwa na baadhi ya Viongozi kwa sababu ya tamaa.

Balozi Seif amesema hata baadhi ya wananchi wamekuwa wakiendelea na ujenzi holela wa nyumba za kudumu bila ya kibali na wakati mwengine katika maeneo yasiyoruhusiwa kama vile sehemu za vianzio vya maji pamoja na maeneo yaliyotengwa kwa ajili ya ujenzi wa miji ya kisasa.

Amewatanabahisha watu wote waliojenga katika maeneo hayo kuacha kufanya hivyo mara moja sambamba na Viongozi wenye tamaa ya fedha au kujilimbikizia maji wajisafishe kabla mkondo wa sheria haujawakumba.

Mapema ndani ya kipindi cha siku mbili  cha Mkutano huo wa Baraza la Wawakilishi  Wajumbe wa Baraza la hilo walipata fursa ya kuijadili Hotuba ya Rais wa Zanzibar na Mwenyekiti wa Baraza la Mapinduzi Dr. Ali Mohammed Shein aliyoitoa mapema wiki hii wakati akilizindua rasmi Baraza hilo.

Pamoja na mambo mengine Wajumbe kadhaa wa Baraza hilo walielezea umuhimu wa Wananchi kwa kushirikiana na viongozi wao Majimboni kuelekeza nguvu zao katika ujenzi wa Taifa  ili kuisimamia ipasavyo Ilani ya Chama kilichopata ridhaa ya kuongoza Dola katika Kipindi cha miaka mitano ijayo ambacho ni CCM.

Mkutano wa kwanza wa Baraza la Tisa la Wawakilishi Zanzibar umeahirishwa katika Ukumbi wa Baraza hilo Mweni hadi asubuhi ya Jumatano ya Tarehe 18 Mei 2016.