Dina Foundation: SMZ imetusaidia kutoa huduma kwa wananchi.

Rais wa Shirika la Kimataifa lisilo la Kiserikali linalosaidia Wananchi wenye kipato cha chini na wale wanaoishi katika mazingira magumu {Dina Foundation} Runne Evardsen amesema mchango uliotolewa na Serikali ya Mapinduzi ya Zanzibar katika kuunga mkono taasisi hiyo umewawezesha kutoa huduma za kibinaadamu kwa wananchi waliowengi  Zanzibar.

Amesema mchango huo muhimu ulioleta faraja kwa watendaji wa shirika hilo umewaongezea nguvu za kuendelea kutoa huduma hasa za kiafya kwa wananchi wapatao Laki 150,000 kwenye shehia zipatazo 60 Unguja na Pemba.

Evardsen amesema hayo akiuongoza Ujumbe wa Viongozi  Watano wa  Shirika hilo la Dina wakati wa mazungumzo yake na Makamu wa Pili wa Rais wa Zanzibar Balozi Seif Ali Iddi Ofisini Vuga Mjini Zanzibar.

Amesema watendaji wa Dina hivi sasa wanaendelea na mradi wa huduma za afya  kwa kutumia gari Maalum ambapo kila Jumamosi huzunguuka kwa hutoa huduma za matibabu bure kwa wagonjwa katika maeneo tofauti.

Rais huyo wa Shirika la Kimataifa lisilo la Kiserikali linalosaidia Wananchi wenye kipato cha chini na wanaoishi katika mazingira magumu amefahamisha kuwa malengo ya baadaye ya Taasisi hiyo ni kujenga kituo cha kudumu  kama walivyofanya katika Nchi za Rwanda na Jamuhuri ya Kidemokrasi ya Congo  DRC}.

Ameeleza kuwa kazi hiyo imepangwa kwenda sambamba na uimarishaji wa utoaji huduma nyengine za matibabu kama Meno pamoja na kuwapatia msaada wa Baskeli Maalum Watu wenye ulemavu {Wheel Chair}.

Akitoa shukrani zake  kwa huduma zinazotolewa na Shirika hilo la Dina Makamu wa Pili wa Rais wa Zanzibar Balozi Seif Ali Iddi amesema Serikali itaendelea kutoa ushauri na ushirikiano ili kuona huduma zinazotolewa na Taasisi hiyo zinawafikia Wananchi walio wengi hasa Vijijini.

Amesema Mpango unaoendelezwa na Shirika la Dina unakwenda sambamba na ile azma ya Serikali ya Mapinduzi ya Zanzibar ya kuwapatia huduma bora za afya Wananchi wake.

Katika kuimarisha sekta hiyo Balozi Seif amefahamisha kuwa Sera ya Afya imetoa muongozo unaofahamisha vyema kuwa huduma za afya ya msingi zipatikane katika masafa yasiyozidi Kilomita Tano.

Hata hivyo Balozi Seif ameueleza Ujumbe huyo wa Shirika hilo  kuwa zipo baadhi ya changa moto zinazokwaza mpango huo lakini Serikali  imejizatiti kuhakikisha miradi iliyoanzishwa kwa ajili ya mpango huo inafanikiwa.

Balozi Seif ameipongeza Serikali ya Norway kupitia Shirika hilo kwa jitihada inazochukuwa katika kuunga mkono harakati za Maendeleo za Wananchi wa Zanzibar.

Shirika la Kimataifa lisilo la Kiserikali linalosaidia Wananchi wenye kipato cha chini na wanaoishi katika mazingira magumu {Dina Foundation} lenye Makao Makuu yake Nchini Norway hutoa huduma zote za afya ya msingi kutegemea mahitaji ya Wananchi wanaohusika.

 

Kushoto ya Balozi Seif ni Rais wa Shirika hilo Runne Evardsen, 

Naibu Mkurugenzi wa Dina Zanzibar Bishop Daniel Kivilemba Kwiyeya

 na kulia ya Balozi Seif ni Mkurugenzi wa Dina Tawi la Zanzibar

Bishop  Donath Dickson Kaganga, Daktari dhamana wa Dina Zanzibar

 Dr. Abdulhamid Mohammed Ali pamoja na Katibu Mkuu wa Dina 

Baraka William Nyurahe.

Othman Khamis Ame

Ofisi ya Makamu wa Pili wa Rais wa Zanzibar

2/2/2016.